Google+

2012, ഒക്‌ടോബർ 24, ബുധനാഴ്‌ച

പാക്കിസ്ഥാനിലെ ഒരു പെണ്‍കുട്ടിയും നമ്മുടെ പെണ്‍കുട്ട്യോളും

അതെന്നെ, അതെന്നെ. മലാല തന്നെ. ഇതിപ്പോ ഓളെ സുഖാക്കീല്ലേ? ഇപ്പോ എന്തിനാ ഇതും കുത്തി പിടിച്ച് വരുന്നെ, എന്ന് ചോദിച്ചാല്‍ ഞാന്‍ പറയും കാരണണ്ട് എന്ന്.

മലാലയുടെ ഡയറി കുറിപ്പുകള്‍ കുറച്ചൊക്കെ വായിച്ചു. സംഗതി ജോറ് തന്നെ. ഒന്നൊന്നര സംഭവം. ഇത്തിരിപോന്ന പെണ്ണിന് ഇത്ര ധൈര്യംന്ന് പറഞ്ഞാ, സമ്മതിച്ച് കൊടുക്കണം.

ഈയിടെ കൊറെ അലവലാതികള്‍ അവളെ വെടിവെച്ചിട്ടുവത്രേ. ഇന്നാലില്ലാഹി വ ഇന്നാ ഇലൈഹി റാജിഊന്‍. നമ്മുടെയെല്ലാം പ്രാര്‍ത്ഥന കൊണ്ടും തക്കസമയത്ത് കിട്ടിയ ബ്രിട്ടീഷുകാരുടെ ചികിത്സ കൊണ്ടും ഇപ്പോ കുറെ ഭേദമായി. അല്‍ഹംദുലില്ലാഹ്.

നമ്മള്‍ കുറെ ഫേസ്ബുക്ക് ബുജികള്‍ (ഈ പ്രയോഗം തേഞ്ഞ് തുടങ്ങിയെന്കില്‍ ക്ഷമിക്കണം) സ്ഥിരം പഞ്ചാര, കത്തി, സിനിമാ തല്ല്, രാഷ്ട്രീയക്കാരെ കളിയാക്കല്‍ തുടങ്ങിയ ലൊടുക്ക് പരിപാടികളുമായി തേരാ പാരാ നടക്കുമ്പോ കിട്ടിയ ഈ വാര്‍ത്ത പരമാവധി ആളുകളെ അറിയിച്ച് ബോധവാന്‍മാരാക്കി. ആത്മാര്‍ത്ഥമായി ചെയ്തവര്‍ക്ക് എന്റെ ആശംസകള്‍. അതിനിടയില്‍ കിടന്ന് വാഴ വെട്ടുകയും തേങ്ങയിടുകയും ചെയ്തവന്മാരെ... എന്ത് പറയാന്‍?

ഈ ഫേസ്ബുക്ക് എന്ന സാധനം ഉപയോഗിക്കുന്ന ബഹുഭൂരിപക്ഷം പേര്‍ക്കും ഈ സൈറ്റ് ഒരുപക്ഷേ വാര്‍ത്തകളുടെ primary source ആണ്. ഇതിന് പുറത്ത് വേറെ സൈറ്റുകള്‍ ഉപയോഗിച്ച് വാര്‍ത്ത അറിയാനോ verify ചെയ്യാനോ മിക്ക ആളുകളും മെനക്കെടാറില്ല.


ഈ മലാലയുടെ പ്രശ്നം നടക്കുമ്പോള്‍ നടന്ന് കൊണ്ടിരിക്കുന്ന വെറെ ഒരു സ്ത്രീ പീഡന പ്രശ്നമായിരുന്നു, ഹരിയാനയിലേത്. അതുമായി ബന്ധപ്പെട്ട് എത്ര ചര്‍ച്ച നടന്നു. ചില്ലറ ബ്ലോഗുകള്‍. ഒന്ന് രണ്ട് ചര്‍ച്ചകള്‍. തീര്‍ന്നു. നമ്മളെന്താ ഇന്ത്യക്കാരല്ലേ? അതോ താലിബാന്‍ നടത്തുമ്പോഴെ അത് പീഡനമാവുകയുള്ളു എന്നുണ്ടോ? ജാതിയിലുള്ള ഉയര്‍ച്ച താഴ്ച നോക്കി പീഡിപ്പിക്കുന്നത്, നമ്മുടെ ആരുടെയും പെങ്ങന്മാരെ അല്ലെന്നുണ്ടോ?

"അതിപ്പോ ഹരിയാനയിലല്ലേ? അതങ്ങ് നോര്‍ത്ത്..." എന്ന് പറയാന്‍ വരുന്നവരോട് വെറെ ഒരു വാര്‍ത്ത കാണിച്ച് കൊടുക്കണം. നമ്മടെ കേരളത്തില്‍ തന്നെ. ഒരു അമ്മ സ്വന്തം മകളെ കാഴ്ചവെച്ച് വാണിഭം ചെയ്ത് പിടിയിലായ വാര്‍ത്ത. അതൊന്നും നമ്മുക്കറിയണ്ടേ? ഈ സ്ത്രീയുടെ അടുത്ത് കാശ് കൊടുത്ത് മകളെ പ്രാപിക്കാന്‍ ചെന്നത്, എല്ലാം വിദേശികളൊന്നും അല്ലല്ലോ?

ഇതൊക്കെ നോക്കാന്‍ ആര്‍ക്കാ ഇവിടെ നേരം അല്ലേ? ഒരു ഫോട്ടം തന്നിട്ടുണ്ടെന്കില്‍ ഷെയര്‍ ചെയ്ത് കളിക്കാം. പ്രൊഫൈല്‍ ചിത്രത്തിന്റെ മൊഞ്ച് കണ്ട് ഓളോ(നോ)ട് ചാറ്റ് ചെയ്യാനിരിക്കാം. വാര്‍ത്തയോ? എന്ത് വാര്‍ത്ത? ഇപ്പോ എല്ലാം പോസ്റ്റല്ലേ, ചങ്ങായി?

കുറിപ്പ്:കലികേറുന്നുണ്ടെന്കില്‍ ഒരു കാര്യം ചെയ്യാം: എന്നെ ഒരു താലിബാന്‍ സ്നേഹിയായി മുദ്ര കുത്തിക്കോ. എന്നോട് പറയണ്ടാ. (എനിക്കവരെ ഇഷ്ടമല്ല. അതെന്നെ.)

2012, ഒക്‌ടോബർ 13, ശനിയാഴ്‌ച

പച്ച

വായിച്ച് തുടങ്ങുന്നതിന് മുമ്പ്:
പരമകാരുണികന്‍റെ ദാസന്‍മാര്‍ ഭൂമിയില്‍ കൂടി വിനയത്തോടെ നടക്കുന്നവരും, അവിവേകികള്‍ തങ്ങളോട്‌ സംസാരിച്ചാല്‍ സമാധാനപരമായി മറുപടി നല്‍കുന്നവരുമാകുന്നു. (വിശുദ്ധ ഖുര്‍ആന്‍ 25:63)
വിഡ്ഡികള്‍ക്ക് പ്രസംഗിക്കാന്‍ പീഠം കൊടുത്ത പോലെയാണ് ഫേയ്സ്ബുക്കിലെ ചില പ്രൊഫൈലുകള്‍. വസ്തുതക്ക് നിരക്കാത്ത എന്തെന്കിലും വിളിച്ച് പറഞ്ഞ് കയ്യടി വാങ്ങുന്ന കൊറെയെണ്ണം. ഇനി താന്‍ പറയുന്ന കാര്യങ്ങള്‍ വസ്തുനിഷ്ഠമല്ലെന്ന് ആരെന്കിലും ബോധിപ്പിക്കാന്‍ ശ്രമിച്ചാലോ, പിന്നെ feelings ആയി. ദേഷ്യം ആയി. കൊഞ്ഞനം കുത്തലായി.

Free Thinkers എന്ന ഒരു ഗ്രൂപ്പ് കണ്ടു. അതിലൊരു പോസ്റ്റ്. മതം തിരിച്ചുള്ള ജനസംഖ്യാ കണക്കെടുപ്പ്. എന്നിട്ടൊരു ഗമണ്ടന്‍ കണക്കും: ഈ വളര്‍ച്ചാ നിരക്കില്‍ പോയാല്‍ മുസ്ലീംകള്‍ ഭൂരിപക്ഷം ആകും. അതിന് ശേഷം ഉള്ള കമന്റാണ് എന്നെ ശരിക്ക് വിഷമിപ്പിച്ചത്. "അങ്ങനെ ഭൂരിപക്ഷം ആകുന്നത് കൊണ്ടാണത്രേ, കേരളത്തെ ഇപ്പോഴേ പച്ച പുതപ്പിച്ച് തുടങ്ങിയതെന്ന്"

എന്റെ പൊന്നു ചങ്ങായിമാരെ! പടച്ചോനാണേ! ഞമ്മക്ക് പച്ച മാണ്ട! പടച്ചോന്‍ പറഞ്ഞിട്ടില്ല. റസൂലും പറഞ്ഞിട്ടില്ല, ഇങ്ങനെ ഒരു പച്ചന്റെ കാര്യം. റസൂലിന് പിരിശപ്പെട്ട നിറം വെള്ളയാണ് പോലും. പിന്നെ ഏത് പച്ചന്റെ കാര്യാ ചങ്ങായി ഇയ്യ് പറഞ്ഞേ? അല്ലെന്കിലും  ഇങ്ങളോട് പറഞ്ഞിട്ടെന്ത് കാര്യം. മതവിശ്വാസികളുടെ ഭൂരിപക്ഷം ഒരു ജനാധിപത്യസമൂഹത്തില്‍ ഇമ്മിണി വല്ല്യ കാര്യമെന്ന് വിശ്വസിക്കുന്ന ഒരു "സ്വതന്ത്രചിന്തകന്‍" ആണല്ലൊ?

അപ്പോ സ്വതന്ത്രചിന്ത തെറ്റാണോ? അല്ല ചങ്ങായി. പക്ഷെ അറിവിന്റെ ഒരു പിന്‍ബലവുമില്ലാതെ, കാറ്റില്‍ പാറ്റി വിടുന്ന പോലെ വിടുന്ന ചിന്തകള്‍ നല്ലതാണെന്ന് ഞാന്‍ പറയില്ല.

മുസ്ലീമുകള്‍ കൂടുന്നതിന് നിങ്ങള്‍ പേടിയുണ്ടോ? എന്തിന്? ഇത് അത്ര വല്ല്യ ഒരു ഗൂഢാലോചന ആണെന്ന് തോന്നുന്നുണ്ടോ? ഇത് കല്ല്യാണം കഴിക്കുന്ന എല്ലാവര്‍ക്കും വരുന്ന ഒരു അറിയിപ്പാണോ? അങ്ങനെ ഒരു അറിയിപ്പിനെ കുറിച്ച് ഞാന്‍ എന്റെ കുടുംബത്തിലെ എല്ലാരോടും ചോദിച്ച് നോക്കി. അവര്‍ക്കാര്‍ക്കും അങ്ങനെ ഒരു നോട്ടീസ് കിട്ടിയില്ല. നമ്മുടെയൊക്കെ വീട്ടില്‍ മക്കളെ നോക്കിക്കാണുന്നത് ഒരു ഐശ്വര്യമായിട്ടാണ്. ഒരു രാഷ്ട്രീയ ഗൂഡാലോചന മക്കളെ ഉണ്ടാക്കുന്നതുമായി ബന്ധപ്പെടുത്തുന്ന താന്കളോട് എനിക്കൊന്നും തോന്നുന്നില്ല. താന്കളുടെ സന്തതികള്‍... അവരെ എങ്ങനെ നിങ്ങള്‍ നോക്കിക്കാണും?

അതിനുള്ള മറുപടി കേട്ടപ്പോഴായിരുന്നു, സത്യത്തില്‍ ഞാന്‍ ലജ്ജിച്ചത്: ഹിന്ദുക്കളും കൃസ്ത്യാനികളും "impotent bastards" ആയത് മുസ്ലീംകളുടെ തെറ്റാണോ?

കൊടുകൈ! നീ ഇസ്ലാമിന്റെ പേര് തറയില്‍ വലിച്ച് നടന്നു. ഇനിയും വിളിക്കൂ അവരുടെ തന്തയ്ക്കും തള്ളയ്ക്കും. ജനങ്ങള്‍ ഈ മഹത്തായ ഉദ്ധരണിയെ ഇസ്ലാമികസംസ്കാരമായി ഉയര്‍ത്തിക്കാണിക്കട്ടെ! അവര്‍ മുസ്ലീംകളെ അവജ്ഞയോടെ നോക്കട്ടെ!

മുഹമ്മദ് നബിക്ക് സഹിക്കേണ്ടി വന്ന ത്യാഗങ്ങള്‍ വായിച്ച് നോക്കുക. അവയോരോന്നിനോടും മുഹമ്മദ് നബിയോടുള്ള പെരുമാറ്റം വായിച്ചറിയുക. ഖുര്‍ആന്‍ വായിച്ച് പഠിക്ക്.

കുറിപ്പ്: അബ്രഹത് ചക്രവര്‍ത്തി, ക‌‌അബ പൊളിക്കാന്‍ വന്ന കഥ കേട്ടിട്ടുണ്ടോ? പോകുന്ന വഴിക്ക് അബ്ദുല്‍ മുത്തലിബിന്റെ കുറെ ഒട്ടകങ്ങളെ പിടിച്ച് കെട്ടി. മൂപ്പര് നൈസായിട്ട് ചെന്ന് മുട്ടി നോക്കി. അപ്പോ അബ്രഹത്ത് ചോദിച്ചു: "നിങ്ങളുടെ ദേവാലയം പൊളിക്കാന്‍ വേണ്ടിയാണ് ഞാനീ സൈന്യം കൊണ്ട് വരുന്നത്. എന്നിട്ട് നിങ്ങള്‍ക്ക് നിങ്ങളുടെ ഒട്ടകമാണോ വലുത്?"

"ഒട്ടകങ്ങള്‍ എന്റേതാണ്. അത് കൊണ്ട് ഞാന്‍ വന്നു. ദേവാലയം ദൈവത്തിന്റെയും." പിന്നെ ഉണ്ടായ ചരിത്രം : വിശുദ്ധ ഖുര്‍ആന്‍ 105:1-5

പ്രവാചകന്‍ ജനിക്കുന്നതിന് മുമ്പ് പ്രവാചകന്റെ പിതാമഹന്‍ കാണിച്ച ധൈര്യവും ദൈവവിശ്വാസവും  പോലും പ്രവാചകന്റെ അനുയായികള്‍ക്ക് കാണിക്കാന്‍ പറ്റാതായോ? "ദൈവത്തിന്റെ മതം" സംരക്ഷിക്കുന്ന ഗുണ്ടകളാകണോ നമ്മള്‍?

നിങ്ങളുടെ മേല്‍‌ സമാധാനം ഉണ്ടാവട്ടെ!!